هاكونا ماطاطا

هاكونا ماطاطا يا ريِّس لذيذ
يا حاكم بعمرك وحكمك يغيظ
ف حضرة جلالتك يطاطي الرجال
ونحلم بكرمك ما يخطر ببال
سنينك بلاوي ما ترضيِ البغال
متشغلش بالك ده شعبك معيز
هاكونا ماطاطا يا ريِّس لذيذ

هاكونا حكاوي بقالها سنين
صابر بغلبي وصبري متين
ونعلي ف عهدك صار الجبين
همّي راكبني .. أشكي لمين
سامع يا ريِّس
شعبك حزين
تيييتك في بقه .. بقاله سنين

ومحلا الكرامة بين الجياع
ومخزن غلابة سادُّه السباع
وراضية يا بلدي بحكم البتاع
نافي الضماير لسجن فولاذ
وبايع ف خيرنا نفط وغاز
وبكره يفرط ف نيلنا العزيز
هاكونا ماطاطا يا ريِّس لذيذ

قولي يا ريِّس يا ابن الحلال
تعرف لاوندي
طب ارطنلي هندي
وقولي ف عهدك بكام الضمير
بكام الرشاوي ف كرش الوزير
بكام السعادة يطولها الفقير
وكلمة حق ما لها طريق
وصاحب قضية ف شرفه غريق
وبركان فساد يشوفه الضرير
نجمة وغناوي خنقها الخداع
وكلمة ف مظاهرة نطقها شجاع
أرحل بعصرك يا أسوأ مصير
وهكسر ف دابرك قلة وزير
وأقول بكره احلى
وبلدي اللي جاية
برقبة باريز
هاكونا ماطاطا يا ريِّس لذيذ

إسلام المصري
3/5/2009