عارفـة

عارفة إني بحبك
ولا لسة ماعرفتيش
ولا تكوني فاكرة
اني بقولها كلمة
ومن جوايا مابعنيش
طب اسمعيها كلمة
يمكن تريح بالي قبل بالك
كلمة تحنن قلبك عليا
وترضي يداروا جتتي
بعد الممات
يمْ بابك
جايز أنول الوصل
والمح خطوتك تتهادى
كل صباح
ترمي السلام .. تتنهدي
أو حتى قولي حبنّي
كلب وراح
كل شئ منك مباح
أو حتى ممكن – بالغلط-
ترمي دمعة
لا .. إلا دي
أنا عشت عمري كله
لأجل أمنعك م البكا
فمتجيش بعد ما اموت
وتبكي
ساعتها هشعر قد ايه
أنا عاجز
ده ما يرضيكيش
حتى ان كنت عندك
ما بساويش
برضه الميت له حرمته
وأنا قبل ما اموت
برضه كان ليا حرمتي
انتي كنتي حرمتي
معاذ الله
مش قصدي حرمة
كيف ما الناس يعرفوها
لا
حرمة حرمتيني الحياة
إلا ف رحابك
وصبحت درويش
منين ما تروحي
قلبي ملضوم بكعابك
وقالوا عليا موهوم
وقالوا عليا مظلوم
لكنهم نسيوا يقولوا
اني بحبك
عارفة إني بحبك
ولا لسة ماعرفتيش
ولا تكوني فاكرة
اني بقولها كلمة
ومن جوايا ما بعنيش
عارفة
كنت افتكر
ان نومة العازب
دي رقصة ولا حركة
لا ديه حقيقة
وكنت افتكر اني وأنا معاكي
أنا عازب
ده شئ كاذب
وانا معاكي
حالي كان افضل
من حال المتجوزين
اقله كل ليلة كنت اخد صورتك
في صدري
وانام
وانا ضامن اني بكره راح اشوفك
ولجل بختي
يمكن تجيلي ف المنام
واصبح الاقيكي تقولي
صباح الخير يا حبيبي
ايوه انا كنت حبيبي
ومن يوم ما قلت بحبك
وانتي تناديني حبيبي
واهي كلمة والسلام
دلوقتي ليه تستخسريها
وتقولي يرحمك الله يا إسلام
ما تقولي يرحمك الله يا حبيبي
ولا هما الميتين ملهمش نفس
قوليها ، واهي تبقى ونس
ماتخافيش
حبنا عمره ما كان عيبة
ربنا يعلم
إن اللي بينا توبُه طاهر
عمر ما طاله دنس
ويعلم كمان اني احبك
أكتر ما بتحبيني
ماتنكريش
الحسبة ساهلة
اتنين ناقص واحد
يسوى مافيش
مش كان بينا عهد
اننا نموت سوا
واديني مت
وانتي لساكي تتنفسي
طب مين فضل ع الوعد
ومين اللي صان العهد
ومين اللي واللي واللي
ايه هتغضبي
خلاص خلاص متتحمقيش
هقول ان أنا اللي خان
وان أنا اللي باع
وان أنا الي جالي قدري
قبل ما يأذن ربنا فيكي
بالرحيل
وهنتظرك ف الآخرة
و ف يدّي جواب اعتذار
واعقدلك من ورد الجنة
إكليل
بس ترضي
كل شئ بيكون لما ترضي
وكل شئ هيكون لاجل ترضي
وبرضاكي كل شئ بيهون
جايز أنا مجنون
بس الأكيد ان بسمتي
وردة دبلانة
يلزمها نورك لاجل تعيش
وإني كلّي
بحالي كلّي
لو تغيبي
مابساويش
وان وشمك على صدري
غسّلوني
وكفّنوني
لسه يبرق
ماينطفيش
ومهما قالوا
هقول بحبك
ومهما كادوا
هقول بحبك
والدنيا لو طبّة ف كفة
حبك يعادل ويفوق عليه
خلاص هروح
بس قَبَلَّه
نفسي لسانك بيها يبوح
مش برضه هما بيسالوا
المحكوم عليه
نفسك ف ايه
ها
عارفة إني بحبك
ولا لسة ماعرفتيش
ولا تكوني فاكرة
اني بقولها كلمة
ومن جوايا ما بعنيش ؟



إسلام المصري
الإسكندرية
11/5/2010