جمهورية كرابم

في جمهورية كرابم
تلاقي اللي يسعد واللي يغم
تلاقي مصانع تلاقي مدارس
تلاقي مصايب تلاقي كوارث
تلاقي تقدم تلاقي ازدهار
تلاقي كارو ومن غير حمار
تلاقي بهيم يقول باقتدار
أنا زعيم وملكي عظيم
ويصرخ فينا بصوت يصم
زعيم جمهورية كرابم

ومحلا الحياة ومحلا المعيشة
في كرابم والله أحلى عيشة
معاك الفلوس
معاك النفوذ
وتلعب معاك ويمكن تفوز
وبدل العيش هتفطر هريسة
وأحلى مدارس وأحلى نوادي
وانضف شوارع واحسن قهاوي
يا نحس اللي مات ومكنش ناوي
يجيها لاجل ما جسمه يرم
دي جمهورية كرابم

وفيها كمان حياة المجالس
وفيها اللي واقف وفيها اللي جالس
وفيها اللي عارف طريقة ودارس
مين اللي فتْ الفتة
ومين اللي دس السم
في جمهورية كرابم

وفيها تلاقي ناس طيبين
عامل صنايعي على فلاحين
ورايح وزير وجاي وزير
وده ف ايده كاس
وده كوز وزير
سلامٌ عليهم شعوبٍ عظام
شعارهم نضافة حياتهم نظام
وتحيا الحضارة ويحيا التاريخ
تاريخهم حيلتهم
حجارة وفسيخ
في شم النسيم وشرب الحشيش
عاش الحشيش على الفطار
بدل الياميش
حضارة حجارة حضارة تخم
في جمهورية كرابم

وف كرابم كل شئ جميل
شوارع نضيفة ومواصلات كتير
ويخت ف بحر ومركب ف نيل
واشي مكيف واشي بدورين
وتوصل لشغلك يا دوب ف دقيقتين
وكله بنظام وكله بضمير
وتخلص مصالحك وتشرب عصير
ف مكتب موظف او حتى وزير
وخيرها ف جيوبنا
وخيرها يعم
دي جمهورية كرابم

وطبعاً كلامي اللي فات كله فشر
دي كرابم مسخة كل عصر
ولجل الأمانة كان اسمها مصر
ولكن ف عهده طالها كل شر
ده عصر سيادته عصر يغم
دي جمهورية كرابم

ومين سمع قصيدتي يفهم ف الحال
في كرابم العربي م الشمال
ولجل ما تفهم وده شئ مهم
هقولك واعيدلك تاني يا عم
دي جمهورية كرابم

==========

ك ر ا ب م * م ب ا ر ك


إسلام المصري
26/11/2007
مدرج التشريح